Талибан Ауғанстанда көкнәр өсіруге тыйым салды

Тыйымды  бұзғандар шариғат заңы бойынша сотталады деп уәде етілген.

Ауғанстанда билікке келген Талибан (Қазақстанда тыйым салынған ұйым) бүкіл елде көкнәр өсіруге тыйым салды. Мұндай бұйрықты қозғалыстың жоғарғы жетекшісі Хайбатулла Ахунзада шығарды.

 «Bakhtar» ауған ақпарат агенттігі жариялаған Талибан лидерінің бұйрығында «қазір барлық ауғандықтар көкнәр өсіруге қатаң тыйым салынғаны туралы хабардар етілді» делінген.

Жоғарғы басшының нұсқауын бұзғандарға шариғат заңы бойынша сотталатынына уәде беріліп, табылған заттың бәрі (көкнәр дақылы) дереу жойылады.

Ахунзада сонымен қатар есірткінің, таблетканың және алкогольдің барлық түрлерін пайдалануға, тасымалдауға, саудалауға, экспорттауға және импорттауға тыйым салды.

Ауғанстандағы барлық есірткі өндіретін кәсіпорындар да тыйым салуға жатады. Оның үстіне «бұл жарлықты орындау барлық ауғандықтар үшін міндетті».