Тальгодағы зорлау оқиғасы: «Жолаушылар тасымалы» әйелге 3 млн теңге өтемақы төлейді

 «Жолаушылар тасымалы» пойызда зорланған әйелге 3 млн теңге төлейді. Талапты астананың азаматтық істер жөніндегі ауданаралық соты қарады, деп хабарлайды Orda.kz. 

«Жолаушылар тасымалы» акционерлік қоғамы жәбірленушіге 3 млн теңге мөлшерінде моральдық зиян өтемақысын төлейді. Алайда құқық қорғаушылар бұл шешіммен келіспейді. Бұл туралы «Не молчи» қорының жетекшісі Дина Таңсәрі жазды. 

Зардап шеккен тарап 832 миллион теңге көлемінде өтемақы талап еткен. Әйел болған оқиғадан кейін ем қабылдаған, кәсібі мен табысын жоғалтқан. Екі рет өзіне қол жұмсауға тырысқан. Елдің әңгімесінен ұялып, жағдайды ұмыту үшін басқа елге көшіп кеткен. 

Бұл атышулы іс әлі күнге дейін қоғамның есінде. 2018 жылдың қыркүйегінде жәбірленуші Астана – Ақтөбе бағытындағы «Тальго» пойызына билет сатып алған. 

Алдымен оның купесінде бір жолаушы болған. Кейін әйел мейрамханадан тамақтанып, қайтып оралғанда, купеде трико мен майка киген жолсерік отырған. Ол көршісін басқа орынға жайғастырғанын айтып, өзі сыра ішіп отырған. Әйел жолсеріктен бірнеше рет кетуін сұраған. Ол кеткен соң есікті кілтпен жауып, ұйықтап қалған. 

Шамамен таңғы сағат 4-те келіншек оянып кеткен, себебі жанында сол жолсерік жатқан. Ол есікті өзінің кілтімен ашқан. Ер адам әйелді зорлаған. Ол шығып кеткеннен кейін купеге тағы бір жолсерік кірген. 

Содан кейін әйел полицейлерді шақырған. Оқиға Қостанай облысы аумағында болды, сондықтан тергеумен жергілікті полицейлер айналысқан. 

Жетес Үмбеталиев пен Колқанат Құрманиязов есімді жолсеріктер ҚР Қылмыстық кодексінің 120-бабы, 1-бөлігі («Зорлау») бойынша кінәлі деп танылып сотталды. Алайда олардың бірі бостандыққа шығып кеткен. Бұл туралы жәбірленушіге айтпаған.