Талғардағы жасөспірім өлімі: 7 күдікті ұсталды

4 қазан күні Талғарда болған төбелес кезінде 16 жастағы жасөспірімнің өліміне қатысты  7 адам ұсталды деп хабарлайды Orda.kz.

Алматы облысы прокуратурасының мәліметінше сот оларды екі айға қамауға алуға санкция берді.

«Біз қоғамдық толқуды түсінеміз және Талғарда болған адам  өлтіру ісі прокуратура органдарының жеке бақылауына алынғанын ресми түрде хабарлаймыз», деп мәлімдеді ведомства.

Сонымен қатар, аталған іске қатысты қандай да бір мәліметтерді білетін азаматтарды прокуратураға немесе полицияға хабарласуды айтты.

Естеріңізге сала кетейік, Шерзат Болаттың қазасынан кейін адамдар митингке шығып,  полиция басқармасының алдында өз-өздерін өртеп жіберумен қорқытты. Сондай-ақ ішкі істер министрі Ержан Саденов тергеуді өзінің жеке бақылауына алуға уәде берді.