Талғардағы қанды оқиға: кісі өлтіру мен бала ұрлауға қатысты күдіктіге 12 бап бойынша айып тағылды

Талғар ауданы Қызылқайрат ауылындағы қанды оқиға бойынша басты күдіктіге 12 бап бойынша, соның ішінде адам өлтіру, зорлау және кәмелетке толмаған баланы қылмысқа тарту айыптары тағылды, деп хабарлайды Orda.kz.

Тергеушілер Талғар ауданы Қызылқайрат ауылындағы жаншошырлық адам өлтіру мен бала ұрлау ісі бойынша сотқа дейінгі тергеуді аяқтады. Бұл туралы марқұмдардың отбасының адвокаттары Асылбек Әбдраимов пен Жандос Палманов мәлімдеді.

«Барлық сараптамалар мен тергеу әрекеттері аяқталды. Іс материалдары тараптарға танысу үшін берілді. Басты күдікті — Е. есімді азаматқа Қылмыстық кодекстің 12 бабы бойынша айып тағылып отыр. Олардың арасында — адам өлтіру, адам ұрлау, зорлау, жыныстық сипаттағы зорлық әрекеттері, заңсыз бостандықтан айыру, алаяқтық, тұрғын үйге заңсыз кіру, өлтіремін деп қорқыту, қару жасау және сақтау, сондай-ақ кәмелетке толмаған баланы қылмыс жасауға тарту баптары бар», — деді адвокат.

Еске сала кетейік, қайғылы оқиға 6 қыркүйекте Қызылқайрат ауылында болды. Жергілікті көлік жөндеу станциясының қызметкері ауыл тұрғынын зорлап, бір ай бойы оны бопсалап, жалаңаш фотоларын жәбірленушінің әріптестеріне таратқан. Кейін ол әйелдің ағасын көшенің қақ ортасында жүрек тұсынан атып, оның екі жасар қызын ұрлап кеткен. 

Белгілі болғандай, қанды оқиға дейін жәбірленушінің туыстары күдіктіні полицияға апарып бергенімен оны босатып жіберген екен. Артынша прокуратура Талғар аудандық полициясының қызметкерлеріне қатысты «лауазымды тұлғалардың әрекетсіздігі» бабы бойынша қылмыстық іс қозғады.