Талғарда жасөспірімдер қатарластарын ұрып, видеосын таратқан

Талғарда жасөспірімдер қатарластарын ұрып, видеосын әлеуметтік желілерде таратқан. Сот кінәлілерден 2,2 млн теңгеден астам өндіріп алды. Алматы облысында қоғамның кең талқысына түскен оқиға нәтижелі аяқталды, деп хабарлайды Orda.kz.

2024 жылдың тамызында Талғардағы бір топ жасөспірім өз қатарласын аяусыз соққыға жығып, бұл әрекетті видеоға түсірген. Кейін бейнеролик әлеуметтік желілерде жарияланып, заң  нормаларын аяқасты ету және «өзін-өзі көрсету» әрекеті ретінде қабылданып, жұрттың ашу-ызасын туғызды.

Басты ұйымдастырушылардың бірінің әкесі ӘҚБтК-нің 127-бабы бойынша әкімшілік жауапкершілікке тартылды.

Алайда жұмыс мұнымен шектелген жоқ: заңгерлер шығындарды өтеу стратегиясын әзірледі. Оған адвокаттарға кеткен шығындар мен моральдық залал да кірді. Кейін сотқа талап-арыз берілді.

Өткен аптада сот шешім шығарып, кінәлі тараптан 2 200 000 теңгеден астам өндіруді міндеттеді.

Заңгерлердің айтуынша, бұл іс жасөспірімдердің әрекетіне бей-жай қарау ата-аналар үшін ауыр салдарға әкелуі мүмкін екенін көрсеткен айқын мысал болады.