Талғар тұрғындары үндеу жариялады

Талғар қаласының тұрғындары Алматы облысының әкіміне стадионымыздың бұзылуына қарсымыз деп үндеу жасады, деп хабарлайды Orda.kz.

Қалада стадионды жекеменшік инвесторға бергелі жатыр деген әңгіме тараған. Егер солай болса, онда бұл араға қарапайым халықты кіргізбейді немесе кіру ақылы болады деп алаңдап отыр жұрт.

«Біз, Алғара ауылының тұрғындары, өзіміз күнде пайдаланып жүрген, балаларымыз да үлгі алып, жаттығып жүрген стадионымыздың бұзылуына қарсымыз. Біз өзіміздің сүйікті стадионымыздың сақталғанын сұраймыз, оны қайта қалпына келтіруді талап етеміз. Бұл – күрделі құрылыс нысаны, оны сүрудің орнына қайта жөндеу керек. Бізге осы жерге директор, жаттықтырушы қажет, халықты спортқа тарту керек. Біз жөндеу жұмысын жасауды сұраймыз!», — деді жиналған халық.

Талғар қаласының тұрғындары егер қаражат жоқ болса, онда халықтан жинау туралы ұсыныстарын да айтты.

«Стадионды бұзуға қарсылардың көбі тұрғындар, бүкіл Талғар халқы қарсы. Егер мемлекетте немесе әкімдікте оны қалпына келтіруге қаражат жоқ болса, онда халықтан жинайық. Әрқайсымыз 1000 теңгеден жинасақ, 70 миллион теңге болады. Бұл қаражат стадионды жөндеуге жеткілікті. Бұл жерді тастауға болмайды. Бұл ортақ іс, бұл – біз үшін маңызды. Біз біргеміз!», — деді тұрғындар.

Еске сала кетсек, Талғарда елді дүрліктірген атышулы іс болған еді. 2024 жылы 4 қазан күні 16 жасар Шерзат Полаттың өлімі елдің назарын аударды. Тілшілер сол маңға барып талай зерттеу жасады. Қоғам шулағаннан кейін Талғардың шенеуніктері бірінен соң бірі қызметтен кеткен еді. Бүгін Шерзаттың өліміне қатысты сот отырысы өтіп жатыр.