Талғар ауруханасында таяқ жеген дәрігерлер жанжал неден басталғанын айтты

Талғар аудандық ауруханасында соққыға жығылған медицина қызметкерлерінің жағдайы ауыр күйінде қалып отыр.

Медициналық мекеме әкімшілігінің хабарлауынша, анестезиолог пен медбике жансақтау бөлімінен жарақат бөліміне ауыстырылды, деп хабарлады Almaty.tv.

Таяқ жеген екі дәрігер бір бөлмеде жатыр. Енді олардың қашан толық қалпына келетінін нақты айту мүмкін емес. Ең көп зардап шеккен анестезиолог-реаниматолог Нұрдәулет Ибадулла. Оның басының ашық жарақаты, сол жақ көзінің контузиясы және басқа да жарақаттары бар.

«Соңғы есімде қалғаны, мен ес-түссіз еденде жатқанымда ұрып-соғып, тепкілеп жатқаны. Туыстары мәйітті алуға рұқсат беруімізді талап етті. Мен оларға бұл маған байланысты емес екенін түсіндірдім, бірақ олар тыңдамады. Олар мені мазақ етіп тұр деп айыптады. Бірақ бұл дұрыс емес. Мен де адаммын. Мен басқалардың қайғысын түсінемін. Мен полицияның рұқсатынсыз мәйітті бере алмадым. Нәтижесінде таяқ жеп соққыға жығылдым. Басым қатты ауырады. Сол көзім әлі ашылмайды», - деді жарақат алған дәрігер.

Естеріңізге салсақ, 19 қыркүйекте Талғар орталық аудандық ауруханасының қызметкерлеріне полицияның рұқсатынсыз қайтыс болған адамның мәйітін бермегені үшін шабуыл жасалған болатын.

Салдарынан екі ер адам төбелес шығарып, анестезиолог пен медбикені жарақаттаған. Шабуыл жасаған азаматтар  8 жылға дейін бас бостандығынан айырылуы мүмкін. Ал олардың туыстары аудандық орталық аурухана дәрігерлерін салғырттық танытты деп айыптайды.