Талдықорған қалалық білім бөлімінің қашқын бас есепшісі миллиард теңгеге жуық ақшамен ұсталды

Өткен бейсенбіде Жетісу облысының сыбайлас жемқорлыққа қарсы қызметінің қызметкерлері Панфилов ауданы аумағында қашпақ болған Талдықорған қалалық білім бөлімінің бас есепшісі Мадлен Серғазинованы ұстады, деп хабарлайды Orda.kz тілшісі дереккөзге сілтеме жасап.

Сыбайлас жемқорлықпен күрес қызметкерлері  48 жастағы әйелді тінту барысында 942 902 117 теңге (ұлттық валютада 617 640 000 және 721 282 АҚШ доллары), құжаттар мен 21 жылжымайтын мүліктің кілттері: 14 пәтер, 7 коммерциялық үй-жай, Toyota Land Cruiser  көлігі мен зергерлік бұйымдарды тапты.

Барлық тәркіленген мүлік 1,2 млрд теңгеге бағаланды.

Облыстық прокуратураның санкциясымен аталған мүліктердің барлығына уақытша шектеу қойылды.

Сонымен қатар, Талдықорған қалалық білім бөлімінің орталықтандырылған есеп бөлімінің бас есепшісінің орынбасары, экономист пен екі есепшісі ұсталды.

Қалалық алты мектептің бас есепшілері  бөтеннің сеніп тапсырылған мүлкін иемденіп, жымқырды деген күдікке ілінген. Ұсталғандар 2020 жылдың қыркүйек айынан 2023 жылдың наурыз айына дейін аса ірі көлемде жалпы сомасы 2 миллиард теңгеден астам бюджет қаражатын ұрлаған.

Әйелдер оқу орындарында іс жүзінде жұмыс істемейтін адамдардың шотына жалақы аударып отырған. Ішкі мемлекеттік аудит департаментінің аудиторлары 95 231 664 теңге шығынды растады. Қалған шығынды есептеу жалғасуда.

Күдікті Серғазинова, оның орынбасары және экономист Қылмыстық іс жүргізу кодексінің 128-бабына сәйкес ұсталып, тиісінше Ескелді аудандық ІІБ, Талдықорған қалалық ІІБ, Көксу аудандық ІІБ уақытша ұстау изоляторына қамалды.

Мектептердің бас есепшілеріне қатысты айыбын толық мойындауға, басқа тұлғаларды әшкерелеуге көмек көрсетуге байланысты процессуалдық қамауға алу шаралары жүргізілмеген.