Талдықорғандағы полигон әкімшілігіне 2,3 млрд теңге айыппұл салынды

Жетісу облыстық прокуратурасы коммуналдық қалдықтарды шығару қызметін көрсететін кәсіпорынның міндетті төлемдерден жалтарып жүргенін анықтады.

Компания 2020-2023 жылдар аралығында Талдықорған қаласындағы қатты тұрмыстық қалдықтар полигонына қызмет көрсетті.

«Есепке сәйкес, көрсетілген мерзімде полигонға 24 мың тонна қатты тұрмыстық қалдықтар қабылданған. Алайда, құжаттарды талдап, өзара есеп айырысуларды салыстыра келе, бұл көрсеткіштер төмен бағаланып, полигонға 138 мың тоннадан астам жеткізілгені анықталды» деп түсіндірді прокуратура.

Кәсіпорын қалдықтардың жинақталуы мен қоршаған ортаға эмиссиясының шегінен асып кеткені үшін әкімшілік жауапкершілікке тартылды. Ол үшін компания 2,3 миллиард теңге айыппұл төлеуі керек.