Талдықорған маңында медициналық қалдықтар өртеніп жатыр

Блогер Дмитрий Перлов Үштөбе ауданының сыртында медициналық қалдықтар өртеніп жатқан полигонды тапты, деп хабарлайды Orda.kz.

Үштөбе ауылының сыртында қолданылған медициналық қоқыстарды өртеп жатыр. Оқиға орнында табылған қалдықтар «В» санатқа жатады, яғни эпидемиологиялық қаупі бар ауру жұқтырған науқастарға байланысты заттар. Полигонда дәрілік ампулалар, шприцтер, инелер және басқа да көптеген медициналық қоқыстар өртенуде.

«В» санатына жататын  қалдықтар арнайы жағдайларда жиналып, жойылуы керек. Жанып тұрған шұңқырдың жанында Талдықорған, Қонаев және басқа қалалардың медициналық мекемелерінің биркалары шашылып жатыр. 

«Бізді мердігерлер улап жатыр ма? Мұндай жағдайға кім жол берді? Мұның артында қылмыстық немқұрайлылық па,  қасақана арандату жатыр ма?»  дейді бейнежазба авторы.

Істің мән-жайын блогер Дмитрий Перлов шақырған прокурорлар анықтайды. Жергілікті билік бұл жағдайға әлі түсініктеме берген жоқ.