Талдықорғандық депутат 2,4 млрд теңгеге тендер ұтып алды

Талдықорғанда мәслихат депутатының компаниясы мектеп құрылысына арналған тендерді ұтып алды. Бұл жұмыстарды атқару үшін фирма 2,4 млрд теңге алады.

Бұл туралы Orda.kz хабарлады.

11 тамызда Алматы облысы құрылыс басқармасының басшысы Дәурен Жолжанов пен «Нұр-Шарағат-Құрылыс» ЖШС бас директоры, депутат Қайрат Кереев мемлекеттік сатып алу туралы келісімге қол қойды.

Тендер жеңімпазы 2,5 жыл ішінде Ұйғыр ауданының Шонжы ауылында 900 орындық мектеп салуы тиіс.

Мектеп 3,66 гектар аумаққа салынады. Ғимарат тоғыз блоктан тұрады: дене шынықтыру және спорт аймағы, демалыс аймағы, экономикалық аймақ.

Демалыс аймағына: 5-9 сыныптар үшін тыныш демалыс аймағы, мектепке дейінгі сыныптар мен бірінші сыныптар үшін көлеңкелі шатырлар астындағы ойын алаңдары, 2-4 сыныптарға арналған ойын алаңдары кіреді.

Жұмыс жобасына футбол алаңы, баскетбол мен волейболдың аралас алаңы, жүгіру жолы, ұзындыққа секіру және биіктікке секіру алаңдары кіреді. Экономикалық аймақта қатты тұрмыстық қалдықтарға арналған қоқыс жәшіктерінің орны, трансформаторлық қосалқы станция, модульдік газ қазандығы, сорғы станциясы болады.

Кереев Талдықорған қаласындағы «Нұр Отан» филиалының партиялық бақылау комиссиясын басқарады.

Еске салсақ, Талдықорған мәслихатының тағы бір депутаты Руслан Валишанов тоғыз қабатты екі үйдің құрылысына 3,6 миллиард теңгеге тендер ұтып алған болатын.

Авторы: Махамбет Абжан

Аударған: Айнура Дарибаева