Талдықорғандық Батырбаевтың туыстары қайта сараптама жүргізуді талап етуде

Талдықорғанда тәртіп сақшылары азаптаған Азамат Батырбаевтың қарындасы сарапшының қорытындысы ағасының дене жарақатын алғанын көрсетеді деп отыр. Бұл туралы Алматыда өткен баспасөз мәслихатында Гүлмира Қасымбекова мәлімдеді.

Әйелдің айтуынша, құқық қорғау органдары оның денесіне қызған темірді басып, қинаған.

«Ағамды бес-алты адам ұрды. Оны шынын айтқанда үтіктеген. Оған жеңіл зиян келді деп қалай айта аласыз? Оның қандай жағдайда екенін түсіну үшін дәрігер болу не арнайы білім алу міндетті емес. Сарапшы фактілерді бұрмалап тұрғаны анық» деді әйел.

Сараптама қайталанбаса, Гүлмира Қасымбекова халықаралық сарапшыларға жүгінбек. Оған қоса, ол фельдшерді де жауапкершілікке тарту керек деп есептейді.

Еске салсақ, Батырбаев 5 қаңтарда Талдықорғандағы наразылық акциясына қатысқан. Өзге шерушілермен бірге ол Назарбаевтың ескерткішін құлатқан. 22 қаңтар 37 жастағы талдықорғандық азаматты құқық қорғау органдары ұстап, оның денесіне ыстық үтік басып, азаптаған. Осыдан кейін полиция азаптау фактісі бойынша қылмыстық іс қозғады. Батырбаевты азаптаған құқық қорғау органы қызметкері ұсталды. Бұл туралы жәбірленушінің адвокаты Бауыржан Азанов мәлімдеді.