Талғат Ермегияевтің түрмедегі бейнежазбасы тарады

Әлеуметтік желілерде Талғат Ермегияевтің түрмедегі бейнежазбасы талқыланып жатыр. Бейнежазбадағы кадрлардан оның спортпен айналысып жатқаны байқалады.

Бейнежазбаны Ербол Еділов өзінің Telegram-арнасына жариялады. Видеода оның жаттықтырушысымен барын салып бокспен айналысып жатқан сәті көрсетілген.

Алматы облысы бойынша қылмыстық-атқару жүйесі департаментінде бейнежазбаға түсініктеме берілді. Олардың мәліметі бойынша, бейнежазба 2019 жылы Алматы облысындағы қылмыстық-атқару жүйесі мекемесінің бірінде түсірілген.

- Қазіргі уақытта бейнежазбадағы сотталғандар бөлек қамалған. Олардың бірі бостандыққа шыққан, - деп хабарлады ҚАЖД.

Ведомствоның мәліметінше, 2021 жылдың наурыз айында мекемедегі тінту іс-шаралары барысында спорттық құрал-жабдықтар тәркіленді. Бұл ретте ҚАЖД сотталғандардың спортпен шұғылдануға және осы үшін бөлінген орында спорттық құралдарды пайдалануға құқығы бар екенін айтты.