Талғарда полицей қағып кеткен жігіттің туысы Тоқаевқа үндеу жасады

Қараша айының ортасында Алматы облысы Талғар қаласында полиция қызметкері қағып кеткен 18 жастағы жігіттің әпкесі президент Тоқаевқа бейнеүндеу жолдады.

Instagram парақшада жарияланған жолдауда марқұм жігітітің әпкесі полицейлердің қатты жылдамдықпен келе жатқанын және қылмыс болған орыннан қашып кеткенін айтқан.

Жол апаты кезінде марқұм жарықтандырылмаған көшенің жиегімен келе жатқан. Күдікті оқиға орнынан қашып кеткен. Жүргізуші сынған алдыңғы терезесін шағып, Қарасай батыр көшесінің бойындағы көпқабатты үйлердің жанында лақтырып кеткен.

Марқұм туысының айтуынша, адам өлімімен аяқталған жол көлік апаты кезінде көлік ішінде тағы бір адам болған. Ол Талғардағы мектептің бірінде әскери даярлық пәнінен сабақ беретін ұстаз екені айтылады.

«Қылмыскердің балаларға сабақ беруге моральды құқығы бар ма деген сұрақ туындайды. Ең қорқыныштысы, олар өздерінің қылмыс іздерін жасырмақ болып көліктің айнасын шешіп тастаған. Менің бауырымның орнында кез келген мектеп оқушысы болуы мүмкін еді» делінген видеоүндеуде.

Әпкесінің айтуынша, жаяу жүргінші қайтыс болар оқиға кезінде полиция қызметкері мас болған. Марқұмның туысы оның мас күйде неге көлік басқарғанын түсіне алмайтынын айтты. Ол полиция қызметкерінің жазасыз қалғанын айтып наразылық білдірді.

«Біз қазір заңды бізден жақсы білетін полиция қызметкерлері заңды белшесінен басып және өрескел бұзып соңында жазасыз қалатын елде өмір сүреміз. Кінәліні қатаң түрде жазалап, екінші адамды да жауапкершілікке тартуды талап етеміз. Осы істі өзіңіздің бақылауыңызда ұстауыңызды сұраймыз» делінген Тоқаевқа жолданған видеода