Таэквондо жаттықтырушысы өз оқушыларына қорлық көрсетті

Алматы облысының Іле ауданында таэквондо жаттықтырушысы тәрбиеленушілерді қорлады, бұл туралы Orda.kz тілшісіне зардап шеккен қыздардың бірінің анасы айтты.

Балалар мен жасөспірімдерге арналған спорт секцияларын жан басына шаққандағы нормативтік қаржыландырудың мемлекеттік бағдарламасы бойынша қыздар таэквондоға тегін жолдама алған. Ата-аналар балаларын жаттықтырушысына сеніп тапсырған.

«Қызым жаттығулардың бірінде басынан жарақат алды, содан кейін басы ауыра бастады. 2021 жылдың қаңтар айының соңында жаттықтырушы қызымның жаттығуға дейін ерте келуін өтінді. Ол келгенде, есікті құлыптауды бұйырып, оған гормондық массаж ұсынған. Ол қызымды одан кейін басы ауырмайтынын және өзін әлдеқайда жақсы сезінетініне сендірген» дейді қыздың анасы.

Қыз бала анасына «гормондық массаж» деп аталатын жаттығу үшін жаттықтырушы беліне дейін шешінуді бұйырғанын айтты. Содан кейін ол оны диванға жатқызып, оны ауыртпалықпен қысып, жақын жерлеріне қолын тигізген. Қыз не істеп жатқанын сұрағанында бапкер «қытық іздеп жүрмін» деп жауап берген. Белгілі болғандай, бұл бір ғана жағдай емес. Тағы бір оқушы «массаж» сеансы туралы осыған ұқсас оқиғасын баяндаған. Оның айтуынша, бапкер оны 9 сәуірде өткізген.

Кейін үшінші қыздың да дәл осындай жағдайды басынан өткергені белгілі болды. Ол жаттықтырушыны зорлады деп айыптады. Оқушы қыздың айтуынша, оқиға 30 наурызда болған. Ол кезде қыздардың барлығы 14 жаста еді. Олардың ата-аналары Іле аудандық полициясына арызданған.

Өзің қалаған шығарсың?

Полиция Қылмыстық кодекстің 121-бабының 3-бөлігі (Сексуалдық сипаттағы зорлық-зомбылық) және Қылмыстық кодекстің 120-бабының 3-бөлігі (Зорлау) бойынша екі жәбірлеу эпизоды бойынша іс қозғады. Бірақ бұны дәлелдердің жеткіліксіздігімен түсіндіріп, қудалау істері жабылды. Кейіннен бұл іс ҚР Қылмыстық кодексінің 122-бабына (16 жасқа толмаған адаммен жыныстық қатынасқа түсу немесе жыныстық сипаттағы өзге де әрекеттер) қайта дәрежеленді.

«Қылмыстық іс Алматы облысының кәмелетке толмағандар істері жөніндегі мамандандырылған ауданаралық сотына жіберілді» деп түсіндірді облыстық полиция департаменті.

Сотқа дейінгі тергеп-тексеру шеңберінде тергеу әрекеттері мен сараптамалар жүргізіліп, ҚР Бас Прокуратурасының келісімімен қудалау фактісі бойынша қылмыстық іс қылмыс құрамының болмауына байланысты тоқтатылды.

Зардап шеккен қыздың анасының айтуынша, полицейлер оқушы қыздарға: «Саған ол ұнаған шығар?» немесе «Өзің қалаған шығарсың?» деген оқушыны қорлайтын сұрақтар қойған.

Қазір сот процесі жүріп жатыр, бірақ ата-аналардың жаттықтырушы жазасыз қалады деуі негізсіз емес.

NeMolchi.kz қорының жетекшісі Дина Смаилованың айтуынша, полиция бұл істе зорлаушының жағына шыққан.

«Жаттықтырушымен жыныстық қатынас тек жаттықтырушының бастамасымен болуы мүмкін. Өзара келісім бойынша емес. Қыздар үшін жаттықтырушы әке сияқты болады - бала 100% сенетін жақын адам. Оның үстіне бала оған тәуелді, өйткені жеңістің, спорттың, жетістіктердің не екенін бәріміз білеміз» дейді құқық қорғаушы.

Дина Смаилова Қазақстанда кәмелетке толмағандарға қатысты заңдарды қайта қарау керек деп санайды. Ол 18 жасқа толмаған балалардың жыныстық қол сұғылмауына қарсы жасалған қылмыстардың барлығы зорлау деп танылуы керектігін алға тартты.

Жақсы адам және үш баланың әкесі

Белгілі болғандай, жаттықтырушы 34 жаста, үйленген, үш баласы бар. Зардап шеккендердің айтуынша, оның әйелі де өзінің шәкірті болған. Әрі ол «Арыстан» дара кәсіпкерлігінің басшысы – сол атпен секцияда қыздар айналысқан.

Дара кәсіпкерлік қызметінің негізгі түрі: 1 санаттағы стационарлық коммерциялық объектілерді қоспағанда, тұрғын емес ғимараттарды салу (коды 41202)

Orda.kz редакциясы жаттықтырушы 4 жыл жұмыс істеген Іле аудандық балалар мен жасөспірімдер спорт мектебінің басшылығына хабарласты. Оқу орнының хатшысы оның оқиға көтерілмей тұрып-ақ, өз еркімен жұмыстан кеткенін айтып, оны өте жақсы сипаттады.

«Оған жала жабылды, ондай ештеңе болған жоқ. Ол жақсы адам, мейірімді, қайырымды, әрқашан бәріне көмектеседі, беделді. Қыздардың өздері тұрмысы нашар отбасынан шыққан, әкелері жоқ. Біреуі үнемі әкесінен таяқ жейді» дейді Маржан Ынтымаққызы.