Тағы да ұшақ апаты: АҚШ-та екі ұшақ соғысты

АҚШ-тың Аризона штаты, Скоттсдейл әуежайында екі бизнес-джет соқтығысты. Қаза тауып, жараланғандар бар, деп хабарлайды Orda.kz. 

ABC News деректеріне сәйкес, Bombardier Learjet 35A қону кезінде ұшу-қону жолағынан шығып кетіп, тұрақта тұрған Gulfstream 200 ұшағына соғылған.  

Learjet бортында бес адам болған. Олардың бірі оқиға орнында көз жұмды, екеуінің жағдайы ауыр, тағы бір жолаушы ауруханаға барудан бас тартты. Бір адамды құтқарушылар арнайы жолмен шығарған.  

АҚШ-тың Федералдық азаматтық авиация басқармасы (FAA) тергеу жұмыстарын бастады. Апаттың нақты себептері әлі белгісіз.