Тағы да Талғар: қылмыстық топ жасөспірімді ұрлап кетті

Талғар ауданы Қызылқайрат ауылында қылмыскерлер баланы ұрлап, отбасынан 5 млн теңге бопсалаған, деп хабарлайды Orda.kz.  

Алматы облысы полиция департаментінің мәліметінше, олар жасөспірім баланы ұрлап кетіп, отбасынан 5 миллион теңге талап еткен. Қазіргі таңда, қарақшылар тобы ұсталды.

«Балқаш ауданы Миялы ауылының 42 жастағы тұрғыны полицияға жүгініп, белгісіз адамдар оның ұлын күштеп Hyundai Elantra көлігіне отырғызып, белгісіз бағытқа алып кеткенін хабарлады. Кейін олар жасөспірімге күш қолданамыз деп қорқытып, жеке сипаттағы бейнежазбаны интернетте таратамыз деп бопсалап, ақша талап еткен»,  деп мәлімдеді полиция департаменті.

Күдіктілер 500 мың теңге көлеміндегі ақшаны алып жатқан кезде ұсталды. Оларға қатысты бопсалау бабымен қылмыстық іс қозғалып, уақытша ұстау изоляторына қамалды. Тергеу жалғасуда.

Айта кетейік, өткен жылы Талғарда 16 жастағы Шерзат Болат  кісі қолынан қайтыс болды. Жергілікті тұрғындар күдіктілердің «Хуторлықтар» деп аталатын қылмыстық топтың мүшелері екенін айтқан. Алайда, Алматы облысының полиция департаменті өңірде ұйымдасқан қылмыстық топтың барын жоққа шығарды.

Сондай-ақ, жақында Талғар ауданында қылмыстық топтың әлеуметтік желі арқылы адамдарды алдап, қақпанға түсіргені хабарланған еді. Оны 19 жастағы Қайнар ауылының тұрғыны ұйымдастырған. Ондағы басты рөлді 17 жастағы қыз атқарған. Ол жәбірленушілермен интернет арқылы танысып, кездесуге шақырған. Ал әңгіме қызған кезінде «аға-інілері» келіп, интимдік жағдайды сылтауратып қорқытып, ақша талап етіп, бағалы заттар мен құжаттарын  тартып алып отырған.