Тағы да бір суицид: AlmaU студенті өз-өзіне қол жұмсады.

Orda.kz редакциясының ботына AlmaU студенті өз-өзіне қол жұмсады деген ақпараты келді. 

Оқиғадан соң университет басшылығы студенттерден сұрау жүргізіп, марқұммен таныс болған-болмағандарын анықтап жатыр. Марқұм болған жас жігіт режиссура факультетінде оқыған екен.

Біз AlmaU хабарласып, оқиғаға қатысты пікір алдық, университет басшылығы суицид фактісін растады.

«2024 жылғы 25 қыркүйек,Almaty Management University университетінде оқитын студентіміздің қайтыс болғанын қайғырып хабарлаймыз.Оқиғаның себебі мен мән-жайы қазіргі уақытта құқық қорғау органдары тарапынан анықталуда. Университет құқық қорғау органдарына толық қолдау көрсетіп, барлық ақпаратармен бөлісуде. Almaty Management University әкімшілігі марқұмның туған-туыстарына шын жүректен көңіл айтады және оның отбасына қажетті қолдауды көрсетеді», — делінген университеттің ресми хабарламасында. 

Сонымен қатар, оқиғаға Алматы полиция департаменті де пікір білдірді.

«Бұл факті бойынша Бостандық аудандық полиция басқармасында қылмыстық іс қозғалды. Оқиғаның мән-жайы анықталуда», — деп қысқаша қайырды департамент.

Айта кетейік, Алматы қаласы бойынша жастар арасында бұл алғашқы суицид емес. Өз-өзіне қол жұмсау оқиғалары 16 қыркүйекте 2 мектеп оқушысының қазасынан басталды.