«Тағы бір жемқор ұсталды» Аграрлық несие корпорациясы филиалының директоры сотталды

Петропавл қалалық соты Солтүстік Қазақстан облысы бойынша «Аграрлық несие корпорациясы» АҚ филиалы директорына қатысты үкім шығарды. Ол ауыл шаруашылығы өндірушілерінен несие алуды жеделдету үшін 100 және 500 мың теңге көлемінде пара алғаны үшін кінәлі деп танылды.

Бұл туралы сыбайлас жемқорлыққа қарсы іс-қимыл агенттігі хабарлады.

Тергеу барысында оның арнайы техника сатып алу және айналым қаражатын толықтыру мақсатында несие алу үшін пара алғаны анықталды. Сот шешімімен ол 7 жылға бас бостандығынан айырылып, мемлекеттік қызметте және квазимемлекеттік сектор субъектілерінде лауазымдарды атқару құқығынан өмір бойына айырылды.

Үкім заңды күшіне енген жоқ.

Еске сала кетейік, Аграрлық несие корпорациясы көктемгі егін егу және күзгі жиын-терім жұмыстарын қаржыландырып келеді. Бюджеттік несиелеу есебінен бөлінген 140 млрд теңгеден бөлек, қосымша қаржыландыру 300 млрд теңгеге өсті. Бұл ҚР Президентінің тапсырмасын орындау аясында Үкіметтің, «Бәйтерек» Ұлттық басқарушы холдингі» АҚ-ның және «Аграрлық несие корпорациясы» АҚ-ның қолдауымен іске асырылады.