Тағы бір «Шерзат ісі»: Өскеменде жалғыз ұлынан айырылған ана топтасып өлтіргендерді жазалауды талап етті

Orda.kz бұған дейін Өскеменде қатыгездікпен қаза тапқан ер адамды аурухана алдына әкеліп тастағаны жайлы жазған болатын. Марқұмның анасы тың деректерді жариялады, деп хабарлайды Orda.kz.

Өскеменде жан түршігерлік қылмыс елді дүр сілкіндірді. 2025 жылдың 30 мамыры күні кешке Бағлан Рахманбердиев есімді ер адамды үйінен алдап шығарып, үш көлікпен келген белгісіз біреулер алып кеткен. Марқұмның анасының айтуынша, ұлын көшеден көлікке күштеп отырғызып, белгісіз бағытқа алып кеткен. Бірнеше сағаттан соң, оның азапталған мүрдесін ауруханаға жеткізіп, кіреберісте тастап кеткен.

«Желіде тараған бейнежазбада көлік аурухана алдына тоқтап, екі ер адам беттеріне маска киіп, дәрігерлерді шақырып жатқан сәті көрінеді. Алғашында олар Бағланды мүгедектер арбасына отырғызбақ болған, алайда оның жағдайы өте ауыр болғандықтан, ол мүмкін болмады. Ақыры, оны әрең дегенде көліктен шығарып, зембілге жатқызып кеткен. Бұдан соң көлік кетіп қалған», — деді анасы. 

Полицияның ресми мәліметіне зер салсақ, алты күдікті анықталған. Алайда марқұмның анасы бұл іске кем дегенде он адамның қатысы бар деп есептейді. Жылап тұрып жазған бейнеүндеуінде ол тергеудің жай ғана ресми емес, әділетті болғанын талап етеді. Оның айтуынша, ұлы кездейсоқ жанжалдың емес, алдын ала жоспарланған қылмыстың құрбаны болған.

Бұл оқиға бойынша қылмыстық іс қозғалды. Құқық қорғау органдары әзірге егжей-тегжейін жария еткен жоқ. Алайда тергеу барысы бұл істің жай ғана тұрмыстық жанжал емес, мұқият ұйымдастырылған қатыгез қылмыс екенін көрсетіп отыр. Күдіктілер саны да артуы мүмкін.

Марқұмның анасының айтуынша, баласын алып кетуге келгендер толықтай қаруланған. Оның сөзіне қарағанда, ұлын алдымен есінен тандырып, кейін үш көліктің біріне күштеп отырғызған. Әйел Бағланды ұзақ уақыт азаптап және қатігездікпен ұрып-соққан деп санайды. Оның қол-аяғы түгелдей сынған.

«Бұл айуандарды тіпті адам деп айтуға келмейді... Жауапқа тартылуын талап етемін. Қалай өмір сүретінімді білмеймін. Мен жалғыз ұлымнан айырылдым. Оны жалғыз өзім өсірдім, әкесіз. Ал олар оны осылайша қатыгездікпен өлтірді… Бұл менің ақылыма сыймайды», — дейді қайғыдан қан жұтқан әйел.

ШҚО полициясы бұл кісі өлтіру фактісі бойынша полиция алдын ала тергеу амалдарын жүргізіп жатқанын мәлімдеді.