Тәжікстанда сел жүріп, тоғыз адам көз жұмды

Тәжікстанда 15 ауданда сел жүрді. Салдарынан тоғыз адам қайтыс болды, оның ішінде он жасар бала да бар. Сондай-ақ, көптеген қалалар мен елді мекендерге материалдық шығын келтірілді.

Бұл туралы Orda.kz хабарлады.

Табиғи апаттан Куляб қаласы мен оның айналасы, сондай-ақ Тәжікстанның оңтүстігіндегі Хатлон облысының бірнеше ауданы зардап шекті. Сол жерде тоғыз адамның сегізі қайтыс болды.

Құтқарушылардың айтуынша, табылған құрбандардың көпшілігі ауылдар арасындағы жолдарда өз көліктерінде көз жұмған. Олар жолда сел жүріп өткенде көліктерінен түсіп үлгермеген. Төтенше жағдайлар комитеті іздестіру-құтқару жұмыстарын әлі тоқтатпады.

Қатты лай болғандықтан, адамдардың денелерін табу қиын  болып жатыр.

– Куляб қаласында үш азамат қайтыс болды, олардың екеуі көлікте болды, ал біреуін тасқын су алып кетті. Шамсиддин Шохин аймағында да үш адам қаза тапты. Олар Шамсиддин Шохин ауданы арқылы Дарваз ауданына қарай қозғалған кезде көлікте болған, - деді Төтенше жағдайлар комитетінің баспасөз орталығының жетекшісі Умеда Юсуфи (Душанбе).

Билік әлі күнге дейін келтірілген шығынның мөлшерін есептеп жатыр. Қазірдің өзінде Кулябта ондаған үй қирап, су астында қалған. Көкөніс бақшалары мен егістіктер сүріліп, көптеген шаруа қожалықтарында мал қырылған.

Сондай-ақ, жолдар да бұзылған. Тек Кулябта, алдын-ала болжам бойынша, қаланың тоғыз көшесі мен аудандарының жол бөлігі бүлінген.

Тәжікстандағы су тасқыны мен лай тасқыны таулы елде, әсіресе көктем айларында жиі кездеседі. Өткен жылы Хуросон аймағында күшті сел жүріп, бір адам қайтыс болған.

Жыл сайын Тәжікстандағы сел салдарынан ондаған адам қайтыс болады, жүздеген үй құлайды.

Төтенше жағдайлар комитетінің хабарлауынша, кем дегенде, 14 мамырға дейін Тәжікстанда қатты жауын-шашын мен сел жүру ықтималдығы жоғары.