Тәуелсіздікке 30 жыл: Украинада қазақтар құрылтайы өтті

Қазақстан Елшілігі мен қазақ диаспорасы Киевте ҚР Тәуелсіздігінің 30 жылдығына орай құрылтай ұйымдастырды.

Бұл туралы Orda.kz хабарлады.

Іс-шара 26 мамырда өтті, басты мақсат - ұлттық дәстүрлерді, тілді сақтау және қазақ диаспорасын біріктіру.

Құрылтайға Украинаның түрлі аймақтарынан келген «қандастар», қазақ қауымдастығының өкілдері, мемлекеттік органдардың басшылары мен Украинаның халық депутаттары қатысты. Іс-шара барысында Қазақстанның Украинадағы Елшісі Дархан Қалетаев студенТ жастар құрылымдарымен, ақсақалдар кеңесі және басқа да бейресми мекемелермен бірге Украина қазақтары қауымдастығын құру туралы бастама көтерді.

Құрылтайдың концерттік бағдарламасына қазақстандық және украиндық шығармашылық топтар қатысты. Елшілік «Эйр Астана» әуекомпаниясының Украинадағы өкілдігімен бірлесіп, Құрылтайға қатысушылар арасында Киев - Қазақстанның кез келген қаласы бағытында екі әуе билетінің ұтыс ойынын өткізді.

Қатысушылар Қазақстан Тәуелсіздігінің 30 жылдығы аясында қазақстандықтар мен барлық отандастарға арналған үндеу қабылдады. Құжат Қазақстан жүргізген саяси, әлеуметтік-экономикалық, мәдени-гуманитарлық реформаларға қолдау білдірді.

Жаңадан құрылған Қауымдастықтың төрағасы болып Киевтегі «Достық» қазақ мәдени қоғамының басшысы Данияр Егембердиев сайланды.