Тәуелсіздік жетістіктерін шетелдік БАҚ-та насихаттаймыз

Президент Қасым-Жомарт Тоқаев мемлекеттік комиссияның отырысында Үкімет пен әкімдерге  бірқатар тапсырма берді, деп хабарлайды ORDA.

Үкімет бұл жолғы отырыста 900-ден астам іс-шараның жоспарын ұсынды. Жиында Мемлекет басшысы ел тәуелсіздігінің 30 жылдығы құр даңғаза мен ысырапшылдықпен өтпеуге тиіс, бұндай бейберектсіздікке апаратын әдеттерден арылу керек, деп қадап айтты.

 «Құр даңғазалық пен ысырапшылдыққа жол беруге болмайды. Пандемия кезіндегі барлық қауіпсіздік талаптары сақталатын болады. Әрбір іс-шараны елге пайдасын тиетін істерге ұластыру қажет»,  деді Қасым-Жомарт Тоқаев.

Президентіміз тәуелсіздіктің 30 жылдығына кезекті мерейтой ретінде емес, ең алдымен тарихи мәні бар оқиға ретінде қарауды тапсырды. Бұл болашаққа деген ұстаным, көзқарасты айқындайтын маңызды белес. Үкімет жоспарына сай, тәуелсіздіктің 30 жылдығы халықаралық және республикалық деңгейде тойланады. Сонымен, тәуелсіздік жылдарындағы  қол жеткізген табыстарымызды өзімізде ғана емес,  шетелдік бұқаралық ақпарат құралдарында да насихаттайтын болдық.

«Бәрінен маңыздысы – экономикалық, саяси және әлеуметтік реформалардың жалғасы ретінде  халықтың жағдайын жақсартсақ, 30 жылдыққа үлкен сый осы болмақ,  деді Мемлекет басшысы.

Президент жекешелендіру аясында жалпы сомасы 5 трлн теңгенің активтері бәсекелестік ортаға берілгенін,  пандемия кезінде елдегі еріктілердің жұмысы жанданғанын атап айтты. Бұл азаматтық қоғамның белсенділігі мен сол іргелі істердің бастауында жастардың тұрғанын аңғартады. Бірақ өскелең ұрпақ арасында жұмыссыздық белең ала бастаған. Енді әкімдіктердің жұмысын бағалау индексіне жастардың даму көрсеткіші де қосылып, әкімдер сол үшін жауапты болады. Президент шетелде де өз елімізде көптеген озық ойлы жастарымыз жүргендігін, келешекте мемлекеттің тұтқасын ұстайтын жастардың жырақта жүргеніне алаңдайтынын да тілге тиек етті. Жастардың Отанға оралуы үшін алдағы 10 жылда арнайы жобалар көбірек жүзеге аспақ.

 «Әлемде ұжымдық ынтымақтастықтың бір түрі ретінде краудфандинг бағыты танылып келе жатыр. Оны азаматтардың қоғамдағы өзекті проблемаларды шешуге қатыстырудың негізгі бағытының бірі ретінде бағалауға болады. Сондықтан Astana Hub технопаркінің базасында бірыңғай краудфандинг тұғырнамасын жасаудың мүмкіндігін қарастыруды ұсынамын. Ұлт үшін ұлы есімдерді ардақтау - перзенттік парыз», деді Президент.

 Тоқаев биыл жыр алыбы Жамбылдың, Алаш арысы Әлиханның және балуан Қажымұқанның мерейтойларын атап өту жөнінде тапсырма берді. Одан бөлек, ұлт тарихын академиялық тұрғыда қайта жазу мәселесін көтерді. Жиынды қорытындысындв Президент құр мақтау мен мадаққа қатысты тағы сын айтты. Үкімет соған сай жоспарын қайта қарайтын болды. Осылайша, Тәуелсіздіктің 30 жылдығын атап өту жобасы Мемлекет басшысына таныстырылды. Іс-шараны ұйымдастыру жұмыстар осы жылдың екінші жартысынан бастап қолға алынады. Осыған орай мемлекеттік комиссияның тағы бір отырысын өткізу жоспарланды.