Тәуелсіз ресейлік БАҚ-ты 63 елден 250 журналист қолдады

Әлемнің 63 елінен 250-ден астам журналист Ресейдің «шетелдік агенттер» БАҚ тізіміне енгізген «Важные истории», DOXA, «Медуза» сынды ресейлік басылымдарын қолдады.

Бұл туралы Orda.kz Азаттыққа сілтеме жасап хабарлады.

Журналистердің ашық хаты DOXA студенттер журналының сайтында Дүниежүзілік баспасөз бостандығы күніне орай жарияланды. Жақында DOXA журналының төрт редакторы қылмыстық іс бойынша күдікті болды.

– Владимир Путин Ресей президенті болған сәттен бастап мемлекет тәуелсіз БАҚ-қа заңнамалық шектеулер, меншік иелерін өзгерту, айыппұлдар мен қылмыстық істер арқылы қысым жасай бастады, - делінген хабарламада.

Хат авторларының айтуынша, «Важные истории» бас редакторы Роман Анин жүргізген зерттеуге кедергі жасау мақсатында қылмыстық іс қозғалған. Сонымен қатар, олар DOXA редакторлары Армен Арамян, Наталья Тышкевич, Владимир Метелкин және Алла Гутниковаға қатысты қылмыстық қудалау мен Медузаны «шетелдік агент» деп танығаны туралы айтылған.

– Жақында Ресей заң шығарушылары енгізген бұл мәртебе басылымға бірқатар қолайсыз талаптарды қояды. Оларды орындамау үлкен айыппұлдарға, сайттың бұғатталуына және оның журналистерін қылмыстық жауапкершілікке тартуға әкелуі мүмкін, - делінген хатта.

Бұған дейін Ресей билігі Азаттық радиосына және Азаттық медиа корпорациясының бірқатар басқа жобаларына «шетелдік медиа агент» мәртебесін берген. Роскомнадзор корпорациясы мен соттар жалпы сомасы 100 млн рубльден асуы мүмкін айыппұлдар сала бастады.

Хат авторлары Кремль «тәуелсіз БАҚ-тың үнін өшіріп, Ресей азаматтарын шынайы ақпаратқа қол жетімділіктен айыруға ниетті» деп санайды. Олар Ресей билігін сөз бостандығын қорғау жөніндегі міндеттерін орындауға шақырады.

Хатқа The Guardian, The Washington Post, Le Monde, Süddeutsche Zeitung, Reuters, Немецкая волна, Украинская правда және т. б. басылымдардың журналистері қол қойды.