Төтенше жағдайлар министрі қанша жалақы алатынын айтты

ҚР Төтенше жағдайлар министрі Орталық коммуникациялар қызметінде өткен брифингте Юрий Ильин қанша жалақы алатыны туралы айтты.

Желіде өрт сөндірушілердің жалақысы 140 мың теңге деп хабарлады. Сіз бұл жалақыны лайық деп санайсыз ба және өз жалақыңызды айта аласыз ба? – деп сұрады Орталық коммуникациялар қызметінде өткен брифингте журналистер.

– Тағы да айтамын, менің жалақым бір миллион теңге шамасында. Бұл жалақыны кез келген министр сияқты үкімет белгілейді. Менің қарамағымдағылар мен қызметкерлерге келетін болсақ, иә, шынында да, жалақы аз. Соңғы жылдары атқарылған жұмыстарға тоқтала кетсек, 2023 жылға жеткенде біздің қызметкерлердің, тек Төтенше жағдайлар министрлігі ғана емес, сонымен бірге бүкіл құқық қорғау жүйесі, бүкіл Қорғаныс министрлігі, Ішкі істер министрлігі қызметкерлерінің жалақысы көтерілді, - деп түсіндірді Төтенше жағдайлар министрі.

Төтенше жағдайлар министрлігі баспасөз қызметінің хабарлауынша, азаматтық қорғау органдарының кадрлық әлеуетін күшейту үшін қызметкерлердің жалақысын кезең-кезеңімен арттыру қарастырылған. Келер жылы қызметкерлердің жалақысы 29 пайызға өседі деп күтілуде.