Тұтқындар полицейлерді өлтірген бұрынғы түрме сатылымға қойылды

Солтүстік Қазақстан облысы Есіл ауданы Заградов ауылдық округінің әкімдігі 29 ғимараттан тұратын кешенді 26,3 млн теңгеге сатуда. Бұған дейін мұнда ЕС 164/4 түрмесі орналасқан, ол  көпшілікке «Жаман-Сопка» деген атпен белгілі.

Бұл туралы Orda.kz хабарлады.

Бұрын EC 164/4 түрмесінде ерекше қауіпті қылмыскерлер жазасын өтейтін. Бұл колония қанды оқиғаларымен әйгілі. 1997 жылы Фролов пен Лавриков деген екі қылмыскер қашып, үш күзетшіні өлтірген. Қашқындар жеті сағат бойы сол жерді аралап, көліктерді ұрлап, адамдарды тонаған. Кейін Фролов өзінің серіктесі Лавриковтың көзін құртқан. Қылмыскер ұсталды.

Ал 2010 жылы 38 тұтқын өздерін жарақаттады: олар жұтқан өткір электродтар асқазанға жабысып қалды. Бұл әкімшіліктің қатыгез қарым-қатынасына наразылық ретінде жасалды.

Тұтқындардың туыстары түрме ішіндегі наразылықтың бәрі аштықтан, киім-кешектің, дәрі-дәрмектің жетіспеушілігінен, әкімшілік өкілдерінің үнемі ұрып-соғуынан туындайтынын айтты.

Колония үш жыл бұрын жабылған. Облыстық прокуратура мұны мекеме жағдайының нашарлығымен түсіндірді. Дәрігерлер жетіспеді, инженерлік-техникалық желілер ескірген және антитеррорлық қауіпсіздікке қатысты сұрақтар туындады. Тұтқындар әр түрлі колонияға орналастырылды.

Енді бұрынғы түрме 26,3 млн теңгеге сатылып жатыр. Кешенге казармалар, асхана, монша мен кір жуу кешені, өрт сөндіру бекеті мен ұңғыма кіреді. 1,8 млн теңгеге казарма ғимараты да бөлек сатуға қойылды.

Сатып алушы сатудың тендерлік шарттарын сақтауы тиіс, ол - объектінің тұтастығын кемінде үш жыл сақтау, сондай-ақ кемінде бес жұмыс орнын құру. Кешенді сатып алғысы келетіндер 3,9 млн теңге кепілдік жарнаны, казарма ғимаратына 281 700 теңге төлеуі тиіс.