Тәртіпсіздіктер кезінде үндеу жасаған белгілі имам халықтан кешірім сұрады

2022 жылы, 4 қаңтардағы оқиғаларға байланысты үндеу жасаған белгілі имам Қабылбек Әліпбайұлы халықтан кешірім сұрады. Оның айтуынша, видеоүндеудегі сөздерін асығыс айтқан.

– Мен, Қабылбек Жұбай Әліпбайұлы. 2022 жылы 4 қаңтар күні елімізде орын алған оқиғаға байланысты айтқан видеоүндеуіме қатысты мынаны баяндағым келеді: Біріншіден, өзім елде болмауыма байланысты, яғни кіші қажылықта іссапарда жүргенімде, халықтың көшеге шығып, еліміздің ахуалына қатысты үндеулерін көрдім. Алайда соңына дейін қарай алмадым сол себепті асығыстықпен айтқан бұл видеоүндеуімді таратпауларыңызды сұраймын, - деді имам.

Бұл үндеуді дін адамын жаман жағынан көрсеткісі келетіндер пайдаланып жатқанын айтқан Қабылбек Әліпбайұлы түсіністікпен қарауды сұрады.

– Екіншіден, сол кезде айтқан менің видеоүндеуімді үшінші тарап, кейбір пиғылы бұзық кісілер әлі де жамағат арасында таратып, дін адамын жаман кейіпте көрсеткісі келеді. Сол үшін түсіністікпен қарайлауларыңызды сұраймын. Үшіншіден, мемлекеттегі кез келген жағдайға байланысты тек құзырлы мекеме өкілдері ғана белгілі баға беріп, ресми пікір беру керек деген ұстанымдамын. Ал дін қызметкерлері өзіне ғана қатысты міндеттемелерін атқаруы тиіс деп санаймын. Қорыта айтқанда, 4 қаңтар күні жазған видеоүндеуім үшін сіздердің алдарыңызда кешірім сұраймын. Сонымен қатар, баршаңызды түрлі фейк ақпараттардан сақ болуға шақырамын!, - деді имам Қабылбек Әліпбайұлы.