Төртінші толқынға байланысты Гонконгтағы мектептер жабылады

Гонконгтың барлық аймағындағы мектептер коронавирустың төртінші толқынына байланысты сәрсенбіден бастап Рождество мерекелерінің соңына дейін жабық болады, деп хабарлайды SCMP сайты.

Гонконг әкімшілігінің басшысы Кэрри Лам:

«Жақын арада барлық мемлекеттік қызметшілерді қашықтықтан жұмыс істеуге ауыстыру керек. Жергілікті тұрғындарға әлеуметтік қашықтық ережелерін сақтамағаны үшін жазаны күшейту жоспарланып отыр», - деп мәлімдеме жасады.

Қоғамдық арақашықтық ережелерін бұзушыларға 2000 гонконг доллар (шамамен 258 АҚШ доллары - ORDA.KZ ескертеді) көлемінде айыппұл салынуы мүмкін.

Гонконгтың медициналық органдары коронавирустың таралу статистикасына сүйене отырып, төртінші толқынның ықтимал салдарын алдыңғы толқын кезіндегіден гөрі ауыр деп бағалайды.

Сонымен қатар екі апта ішінде қарттар мен мүгедектерге арналған интернат үйлерінің барлық қызметкерлері коронавирустық тексеруден өтеді.

Еске сала кетейік, Гонконгта эпидемия басталғаннан бері коронавирустың 6238 жағдайы расталған, және 109 өлім тіркелген.