Төртінші күн қатарынан Каспий теңізі жағасындағы қамыс өртеніп жатыр

Атырау облысындағы Каспий теңізі жағасында тұтанған қамыс өртін төртінші күн қатарынан өшіруге күш салынуда.  Жұмыс барысына батпақты жерлер қиындық тудырып, құтқарушылар тікұшақты қолдануға мәжбүр болды.

Төрт күн бойы жүргізілген Атырау облысында Каспий жағалауындағы өртенген қамысты сөндіру жұмысы тоқтайтын емес. Жұмысқа жеті техника мен 35 қызметкер жұмылдырылған, олар өртті әртүрлі өрт сөндіргіш құралдарымен  және мотопомпалар көмегімен сөндіруге тырысуда, деп хабарлады «Мой город» басылымы.

Сонымен қатар басылым сөндіру жұмыстарына батпақты жерлер мен өсімдіктердің биіктігі қиындатып отырғанын да атап өтті.

Облыстық төтенше жағдайлар баспасөз қызметі өртке қарсы жағдайды бақылау жердегі және әуедегі барлау арқылы жүзеге асырылып жатқандығын мәлімдеді. Өрттің себебі мен ауданы анықталуда.

19 мамырда түске таман Атырау қою қара түтінге оранды. Қала тұрғындары «112» бірыңғай кезекшілік-диспетчерлік қызметінің Call-орталығына қоңырау шала бастады.

Белгілі болғандай, қамыс өрті Тасқала ауылынан 40 шақырым жерде, Кеңөзек ауылдық округіндегі Каспий теңізінің жағасында болған. Барлау кезінде құтқарушылар батпақты жерде 32 гектарға жуық құрғақ шөп пен қамыс жанып жатқанын анықтады.

Тікұшақпен әуеден барлау жүргізу кезінде жану ауданы шамамен 10,6 гектар болатын 6 жану ошағы табылды.  «МИ-8» тікұшағы АПУ-5 көмегімен ауадан су тастау арқылы біраз өрт көзін жойды.

Департаментте өртті сөндіру бойынша іс-шараларды үйлестіру үшін жедел штаб құрылды. Қамысты сөндіру жұмыстары жалғасуда.