Төрт жасар баланы самокатпен қағып кеткен адам ұсталды

Алматыда төрт жасар баланы самокатпен қағып кеткен ер адам ұсталды.

Бұл туралы Orda.kz қалалық полиция департаментінің баспасөз қызметіне сілтеме жасап хабарлады.

Ұсталған 1997 жылы туылған, Алматы облысы Іле ауданының тұрғыны.

– Ер адам өз кінәсін бірден мойындап, жауапкершілікке тартылудан қорқып, баланы қағып кеткеннен кейін оқиға орнынан қашып кеткенін нақтылады. Ол қасында 2000 жылы туған сүйіктісі болғанын қосты. Әкімшілік кодекстің 615-бабы, 2-бөлігі бойынша әкімшілік хаттама жасалды, - деді Алмалы аудандық полиция бөлімінің бастығы Есен Ысқақов.

Бір күн бұрын Алматы полициясы Назарбаев даңғылы мен Қабанбай батыр көшесінің қиылысында төрт жасар баланы самокатпен қағып кеткен адамды іздеп жатқанын хабарлады.

Бала жарақат алған. Ата-анасының айтуынша, ол қатты қорқып, біраз уақыт сөйлемеген.