Түркістанда әйелімен жанжалдасқан азамат өз-өзіне қол жұмсамақ болды

Түркістандық полицейлер өз-өзіне қол жұмсамақ болған ер адамды құтқарып қалды.

Түркістан облысының полиция департаментінде хабарланғандай, сағат 02:00 шамасында Түркістан қалалық полиция бөліміне телефон соғып, көршісіне көмек керек екенін айтқан. Ер адамның айтуынша, көпқабатты үйде тұратын ерлі-зайыптылардың арасында жанжал туындап, әйелге қысым көрсетілген.

– Оқиға орнына патрульдік полицияның экипажы, учаскелік полиция мен төтенше жағдайлар қызметінің қызметкерлері аттанды. Отбасында кикілжің орын алған пәтер иесі полицейлердің талабына көнбей, ниетінен бас тартпаған. Полицейлердің келгеніне ашуланған ол есікті ашпады. Ал іштен: «Көмектесіңдер!» деген әйел дауысы шыққан. Тәртіп сақшылары есіктерді сындырамыз деп хабарлағанда отағасы бесінші қабаттың балконынан секіремін деп қорқытқан, - деді Түркістан облысы полиция департаментінің баспасөз қызметі.

Ведомствода атап өткендей, полицейлер өз-өзіне қол жұмсамақ болған ер адамды аман алып қалды. Ер адамға қатысты әкімшілік хаттама толтырылған.