Түркістанда жол бойына салынған жаңа дәретханалар жарамсыз болып шықты

Түркістан облысында көшедегі әжетханаларға қатысты жанжал шықты. КТК телеарнасының мәліметінше, жақында жол бойында заманауи модульдік әжетханалар пайда болды. Бірақ олар жарамсыз болып қалған. Көптеген дәретханалар бұзылғандықтан, қазір оларды пайдалану мүмкін емес.

- Дәретхана істегеніне істеген-ау, бірақ дәрет шығаратын жері жоқ. Кіріп көрем, болмайды бұл. Былтыр есігі бар еді, қазір есігі де жоқ. Қарайтын адам жоқ. Қараусыз. Кім қарайды бұған? Үкімет қарамайды, басқа қарамайды. Бұл қарапайым халықтың есебінен салынған нәрсе. Дәрет сындырасың, арт жағына. Мынаның ішіне сындыра алмайсың ғой. Өзіңіз кіріп көріңіз, қалай екен, - дейді Келес ауданының тұрғыны Әлібек Құралов.

Жергілікті тұрғындардың пайымдауынша, билік үкіметтің ақшасын желге ұшырған. Бірақ шенеуніктер жол жиегіндегі дәретханаларды орнатқанда ең алдымен азаматтардың жайлылығын ойлағанын айтады. Құрылымдар толық көлемде пайдалануға беріліп, тіпті ауыл әкімдіктері қарайды деп жоспарлаған. Шенеуніктер дәретхана қауіпсіздігін қадағалайтындарды міндетті түрде табамыз деп уәде берді.

- Қараусыз қалған әжетханалар бойынша тиісті ұсыныс хаттар жолданған. Ауыл округі әкімдері тарапынан, Келес ауданы әкімшілігі тарапынан және қазір «Қазавтожол» қоғамдастығының теңгеріміне өткізуге тиісті жұмыс жүргізілуде. Құжаттар рәсімделіп жатыр, - деді Келес ауданы ТКШ бөлімі басшысының міндетін атқарушы Бақытжан Шырынбек.