Түркістанда жекеменшік үйде бес адамның мәйіті табылды, оның төртеуі жас бала

Түркістандағы  жекеменшік үйде бес адам өлі табылды. Қазіргі уақытта оқиғаның мән-жайы анықталып жатыр, деп хабарлайды ORDA тілшісі ҚР ТЖМ ресми өкілі Талғат Уәлиге сілтеме жасап.

Түркістанда жеке тұрғын үйден бес адамның мәйіті табылды, оның төртеуі бала, деп хабарлады төтенше жағдайлар министрлігінің ресми өкілі.

– 27 ақпанда сағат 18.35-те Түркістан облысы ТЖД кезекші-диспетчерлік қызметінің «103» пультіне Түркістан қаласында жеке тұрғын үйінде көршілері арқылы өмір белгілері жоқ 5 адам, оның ішінде 4 кәмелетке толмаған бала табылғаны туралы хабарлама келіп түсті. Үйде өрт белгілері табылған жоқ. Бұл үйде табиғи газбен жылыту орнатылған,  делінген хабарламада.

Оқиға орнында төтенше жағдайлар департаментінің қызметкерлері мен полицейлер, жедел жәрдем мен «ҚазТрансГаз» АҚ мамандары жұмыс істеп жатыр. Қазіргі уақытта оқиғаның мән-жайы анықталуда.

– Оқиға орнына ТЖД (6 қызметкер, 2  техника), ПД (15 қызметкер және 4 техника), жедел медициналық көмек ауруханасы (3 қызметкер және 1 техника), «ҚазТрансГаз»  АҚ (3 қызметкер және 1 техника) қызметкерлері шықты,  делінген хабарламада.

ТЖМ өкілдері газ жабдықтарын пайдалану бойынша қауіпсіздік ережелерін сақтауға шақырады.