Түркістандағы оқушы қыздардың төбелесі Тұрғымбаевқа жолданды

Facebook желісінде сыныптасын аяусыз ұрған оқушы қыздың бейнежазбасы желі қолданушылары арасында қызу талқыға түсті. Шымкенттік блогер видеоны әлеуметтік желіге жүктеген.

Блогер бұл видеоны жариялай отырып, Ерлан Тұрғымбаевқа үндеу жасады. Оның айтуынша жергілікті полиция қызметкерлері мектептегі тәртіптің сақталуына жауап беруі тиіс.

– Ерлан Тұрғымбаев мырза, жергілікті полиция инспекторлары мектептерді аралап «жастар арасындағы қылмысты болдырмау бағытында» түсіндірме жұмыстарын өткізу керек деп ойлаймын. Жасөспірімдер арасындағы бұзақылықты алдын алмасақ, түрме толады, - деп жазды ол.

Оқиға Түркістан облысы, Кентау қаласы №1 -ші мектептің 8-ші сынып оқушылары арасында болған. Жанжал салдарынан Рахымжанқызы Сабинаны бірнеше қыз болып аса қатыгездікпен сабаған. Дереккөздердің ақпараты бойынша, қазіргі уақытта таяқ жеген 14 жасар оқушы қыз Кентау қалалық ауруханасының травматология бөлімінде жатыр.