Түркістанда өгей әкесі 8 жасар қызын зорлады

Түркістан облысында өгей әкесі 8 жасар қызын зорлады. Дәрігерлер баланың өмірін аман сақтап қалу үшін, оның жатырын алып тастауға мәжбүр болған.

«Астана» арнасының хабарлауынша, қыздың анасы жантүршігерлік оқиға 23 ақпан болғанын айтқан. Күйеуі жұбайының ауруханаға кеткенін пайдаланып, көрші ауылда бағып жүрген малын тастап, үйге келген. Ол 3-сынып оқитын өзінің өгей қызын зорлаған. Қансыраған қыз артынша мектепке барған.

«Бастапқыда «құлап қалды» деп сылтауратқанмен, артынша кешірім сұрап мойындады. Енді «есімді білмеймін» деп басқаша сөйлеп отыр. Мамаңа айтсаң, сені тұншықтырып өлтіремін, мамаңды өлтіремін де, өзіңді балалар үйіне өткізіп жіберемін деп қорқытқан. Әлі күнге дейін шошып оянады. Қызымның ана болу мүмкіндігінен айрылғанын жақында ғана сотта естідім» дейді зардап шегушінің анасы.

Қыздың анасының айтуынша, 8 жасар қызға екі рет операция жасалған. Тік ішегін бірнеше жерден тіккен дәрігерлер ақыры жатырын алып тастауға мәжбүр болған.

Шымкенттегі арнайы орталық директоры Малика Жүсіпова өрімдей қыздардың өмірін талқандайтын жағдай тым жиілеп кеткенін айтты.

«Бұл деген сұмдық жағдай ғой. Өмір бойына соттау керек. Ол ауру ғой, ауру қайталанады. 20 жылға сотталды деген, ол педофилизмге аз уақыт» дейді орталық директоры Малика Жүсіпова.

Қазіргі таңда баламен психолог мамандар жұмыс істеп жатыр. Қыз әзірге болашағына балта шабылғанынан хабарсыз.