Түркістанда құдалыққа жиналғандар үйлеріне қайтарылды

Түркістан облысының полицейлері құдалыққа жиналған тұрғындарды үйлеріне тарқатты, деп хабарлайды Orda.kz. Polisia.kz.-ке сілтеме жасап.

Коронавирус індетімен ауырғандар саны күн санап өсіп жатқандығы да халық арасындағы жиын-тойға тоқтау салар емес. Жағдайға байланысты Түркістан облысы Бас мемлекеттік санитарлық дәрігерінің қаулысымен карантин режимі күшейтіліп, бірқатар шектеу шаралары қарастырылды. Полиция қызметкерлері мобильдік топпен бірге осы шектеулердің орындалуын қадағалауда.

Облыста адамдар көп шоғырланатын орындар бақылауға алынып, ойын-сауық орындарының талапқа сай қызмет көрсетуі тексеріліп жатыр. Осындай кезекті профилактикалық-рейдтік шаралар барысында, Мақтаарал ауданының Мырзакент кенті көшелерінің бірінде орналасқан тойханада 80-нен астам адам жиналып, құдалық тойын өткізіп жатқандығы анықталды.

Осыған  қатысты іс-құжаттар жинақталып, заңды шешім қабылдау үшін СЭББ-ге жолданды. Түркістан облысы Полиция департаменті карантин режимі кезінде бекітілген талаптарды орындамай, тұрғындардың денсаулығына қауіп төндіретін азаматтар тиісті жазаға тартылатынын ескертеді.