Түркістанда дәретханаға түсіп кеткен баланы құтқару сәті видеоға түсіп қалды

Түркістан облысының құтқарушылары дәретхана шұңқырына құлап кеткен баланы аман алып қалды.

«23 қаңтарда «112» пультіне Түркістан облысы, Ордабасы ауданы, Темірлан елді мекеніндегі үйлердің бірінің ауласында орналасқан төрт метрлік тереңдіктегі дәретхана шұңқырына 2016 жылы туған бала құлап кеткені туралы хабарлама келіп түскен» дейді Төтенше жағдайлар министрлігінің баспасөз қызметі.

Құтқару жұмыстарына Түркістан облысы ТЖД-нің бес құтқарушысы мен үш жедел жәрдем қызметкері жұмылдырылды.

«Сағат 14:14-те құтқарушылар баланы құтқару арқанымен алып шығып, жедел жәрдем қызметкерлеріне тапсырды. Дәрігердің тексеруінен кейін бала үйіне шығарылды. Қазіргі уақытта баланың жағдайы тұрақты» делінген хабарламада.