Түркістан облысының төтенше жағдайлар қызметі үш жасөспірімді құтқарды

Түркістан облысының құтқарушылары тағы да әбігерге түсті. Бүгін олар таудан тағы үш жасөспірімді құтқарып қалды.

Orda.kz бұл туралы Төтенше жағдайлар министрлігіне сілтеме жасап хабарлайды.

Төтенше жағдайлар министрлігінің ресми өкілі Талғат Уәлидің айтуынша, 17 маусым күні  сағат 17:00 шамасында үш жасөспірім Бүргелік шатқалындағы тауға шығып, қараңғы түскенше қайтуға үлгермей, адасып кеткен. Байланыстың үзілмеуі  ата-аналарға оқиға туралы ескертуге мүмкіндік берді.

Ата-аналар құтқарушыларды  «112» нөмірі арқылы хабардар етті. Құтқарушылар оқиға орнына дереу барып, үш жасөспірімді таудан түсірді. Белгілі болғандай, 2003 жылы туылған жігіттердің бірі тауда аяғын сындырып алған. Жедел жәрдем бригадасы оған алғашқы медициналық көмек көрсетті.

Құтқару жұмыстарына Түркістан облысы Төтенше жағдайлар департаментінен 11 құтқарушы мен үш техника, жедел жәрдем бригадасының үш қызметкері және бір техника қатысты.

—Тауға серуенге шыққанда  бейтаныс жерде жүрмеңіз, өз мүмкіндігіңізді бағалаңыз. Тауда серуендеу кезінде ыңғайлы киім мен арнайы аяқ киім киіңіз. Сақ болыңыз, таулы жер қауіпті екенін ұмытпаңыз, - деп ескертті Төтенше жағдайлар министрлігі.