Түркістан облысында жоғалып кеткен 3 жасар бүлдіршін табылды

Түркістан облысының полициясы 3 жасар бүлдіршінді тауып, анасына қайтарды, деп хабарлайды ORDA. редакциясы Polisia.kz ақпараттық медиа порталына сілтеме жасап.

Қызмет көрсетілетін аумақты шолу кезінде Түркістан облысы Ордабасы АПБ ПД қызметкерлері Темірлан кенті көшелерінің бірінен жоғалып кеткен кішкентай қызды тауып, оны полиция бөліміне жеткізді. Полиция қызметкерлері анықтағандай, аулада ойнап жүрген 3 жасар балақай үйден алыстап кеткен. Ол шамамен 3-4 шақырым жүріп, кері қайтар жолдан адасып қалған.

Іздестіру барысында Ордабасы АПБ-нің қызметкерлері 20-30 минут ішінде қыздың анасын тауып, сәбиді дін аман күйінде анасына тапсырды. Табылған қыздың анасы тәртіп сақшыларына үлкен алғыс білдірді.

«Кешкі сағат 19:00-де менің қызым үйдің ауласында ойнап жүрген, мен өз шаруаммен үйге кірдім. Қызым ауладан көшеге шығып кетіпті. Ордабасы АПБ қызметкерлеріне үлкен рахмет. Олар менің баламды тез тапты. Жұмыстарына сәттілік тілеймін!», - деді қуанған ана.

Түркістан облысының полиция департаменті ата-аналарға балаларына мұқият болуды және қадағалады сұрайды. Бала жоғалған жағдайда, дереу 102 телефоны бойынша полицияға хабарласуыңыз керек.