Түркістан облысында өрттен шопан мен мыңнан астам қой жанып кетті

Түркістан облысында шопан мен мыңнан астам қой өртеніп кетті. Бұл туралы ҚР Төтенше жағдайлар министрлігінің ресми өкілі Талғат Уәли мәлімдеді.

Бәйдібек ауданы, Алғабас ауылынан бес шақырым жерде, шаруа қожалығы аумағында мал ұстайтын екі қабатты ғимараттан өрт шыққан. Хабарлама 101 пультіне 31 қаңтар күні сағат 7.15-те түскені айтылды.

Фермадан жақын маңдағы өрт сөндіру бекетіне дейінгі қашықтық 40 шақырым. Өрт сөндірушілер өрт орнына 40 минутта жеткен. Салдарынан 1150 бас қой мен 150 тонна шөп өртеніп кетті. Оқиға орнында шопанның мәйіті табылды.

Төтенше жағдайлар министрлігінің мәліметінше, өрт 09.37-де оқшауланып, 10.23-те жойылды. Өрт аумағы 781 шаршы метрді құрады. Өрттің шығу себебі анықталуда. Өртті сөндіруге Түркістан облысы Төтенше жағдайлар департаментінің 15 өрт сөндірушісі мен 4 бөлімшесі жұмылдырылды.