Түркістан облысында мұғалімдерге гольф алаңын тазалатпақ болған

Түркістан облысында мектеп мұғалімдері гольф алаңын тазартуға жіберген директордың міндетін атқарушыға қарсы наразылық білдірген.

Бұл туралы Orda.kz хабарлайды.

Білім және ғылым министрлігі таратқан ақпаратқа сәйкес, Түркістан облысы Сарыағаш ауданы Омарова атындағы № 50 мектеп мұғалімдері директордың міндетін атқарушы курорттық аймақтағы гольф алаңын тазартуды тапсырғанын айтып, шағым түсірген. Оқиғаның мән-жайы анықталған соң лауазымды тұлға жұмыстан шығарылған.

Сонымен қатар, БҒМ ұстаздардың заңды құқықтары көбінесе Түркістан және Алматы облыстарында көп бұзылатынын атап өтті.

– Түркістан облысында балабақша тәрбиешісі қызметінен заңсыз босатылды, алайда әкімдіктің білім басқармасы оның құқығын қалпына келтіру бойынша шаралар қабылдамаған. Білім беру саласындағы сапаны қамтамасыз ету жөніндегі аумақтық департаменттің араласуынан кейін ғана тәрбиеші бұрынғы лауазымына қайта оралды.

Алматы облысында департамент қызметкерлері мұғалімнің өтінішінен кейін шаралар қабылдады, онда ол мұғалімдерге қатысты емес қызметтерді атқару фактілері туралы хабарлады. Тексеруден кейін Текелі қаласының № 6 орта мектебінің директорын лауазымынан босату туралы шешім қабылданды. Сонымен қатар, Текелі қаласы әкімдігінің білім бөлімі басшысының міндетін атқарушыны тәртіптік жауапкершілікке тарту ұсынылды, - делінген БҒМ баспасөз қызметінің хабарламасында.

Аудандық білім бөлімдерінің бірінің басшысы әлеуметтік желілерде иммундау шараларын жүргізу тізімі жарияланғаннан кейін тәртіптік жауапкершілікке тартылды. БҒМ атап өткендей, мұндай ақпаратты жинауға ешқандай бұйрық берілмеген.

Сонымен қатар, Атырау облысында педагогикалық этика ережелерін бұзғаны үшін Ахмедияров атындағы орта мектептің мұғалімі жұмыстан босатылды.

БҒМ баспасөз қызметі елдің әр облысында педагогикалық этика бойынша комиссиялар құрылғанын атап өтті, олар педагогтардың өтініштері мен құқықтарының бұзылу фактілерін жедел қарайтын болады.