Түркістан жастары хайп үшін көлікпен адам сүйреген

Түркістан облысында видео үшін ВАЗ-2114 көлігіне адамды арқандап сүйрегендердің видеосы тарады.

Бұл туралы Orda.kz. хабарлайды

– Полиция қызметкерлері әлеуметтік желілерге мониторинг жүргізу барысында Instagram қолданушыларының бірі парақшасына заңсыз әрекетінің видеосын жариялағанын анықтады. Белгісіз біреулер «ВАЗ-2114» автокөлігіне адамды арқандап, оны жолда сүйреген, – деді Түркістан облысы полиция департаментінің баспасөз қызметі өкілі.

Полиция оқиға Түркістан көшелерінің бірінде болғанын анықтап, тәртіп бұзушыларды ұстаған.

– Жүргізуші Түркістан тұрғыны болып шықты, ал оның жанындағы таныстары Тараз қаласынан. Ер адамға қатысты ӘҚБтК-нің екі бабы бойынша әкімшілік хаттама жасалды: 593-бабы 1- бөлігі «Жолаушылар мен жүктерді тасымалдау, жол жүру ережелерінде көзделген қауіпсіздік белдіктерін немесе мотошлемдерді пайдалану жөніндегі талаптарды сақтамау» және 606-бабы 1-бөлігі «Жол жүрісіне қатысушының жол жүрісі қағидаларын апат жағдайын туғызуға әкеп соққан тәртіп бұзуы», – деді полиция өкілі.

Полиция мәліметі бойынша, кінәлілер жасаған әрекетіне өкініп, кешірім сұраған.