Түркістан облысында діни ағым атынан «төңкеріске шақырғандар» жауапқа тартылды

Түркістан облысында «төңкеріске шақырған діни ағым өкілдеріне» айыппұл салынды. Бұл туралы облыстық полиция департаменті мәліметіне сүйенген ҚазТАГ агенттігі хабарлады.

Интернетке мониторинг жүргізу барысында полиция қызметкерлері Вконтакте және Телеграм желілерінде «діни мазмұндағы тыйым салынған контентті» анықтаған. Шұғыл-іздестіру шарасы барасында жазба авторлары анықталған. Әлеуметтік желі парақшаларына аудиожазба жүктеген Жетісай ауданында тұратын екі адам болып шыққан. Хабарламада олардың «деструктивті діни ағым өкілі» екені көрсетілген. Бірақ қандай ұйым екені нақты айтылмаған.

«Сараптамаға сәйкес, аудиожазбалар мен лекциялардағы дерек конституциялық құрылымды күшпен өзгертуге насихаттайды. сонымен бірге ел тұтастығына және мемлекет қауіпсіздігіне нұқсан келтіруге үндейді» делінген жұма күні таратылған хабарламада.

Шара аясында жиналған материалдарды құқық қорғау органдары сотқа жіберді. Оларға Әкімшілік кодекстің 453-бабы («Бұқаралық ақпарат құралдарының өнiмiн, сол сияқты өзге де өнiмдi Қазақстан Республикасының аумағында дайындау, сақтау, әкелу, тасымалдау, тарату») бойынша айып тағылып, әрқайсысы 58 мың теңге көлемінде айыппұл арқалады.