Түркістан облысында 200 адам қатысатын көкпар өтпей қалды

Түркістан облысында 200 адам қатысатын көкпар өткізуге тырысқан  ұйымдастырушыға қатысты әкімшілік хаттама толтырылды, деп хабарлайды ORDA Түркістан облыстық полиция бөлімі -не сілтеме жасап.

Карантиндік режим талаптарының бұзылуын анықтау бойынша рейдтік іс-шаралар барысында Сарыағаш аудандық полиция бөлімі қызметкерлері көкпар ойынын ұйымдастырудың тағы бір фактісін анықтады. Тәртіп сақшылары екі жүзге жуық адам қатысуы тиіс ұлттық ойынды тоқтатты.

Полиция жиналғандармен карантинді бұзуға жол бермеу туралы түсіндірме жұмыстарын жүргізіп, барлық қатысушылар үйлеріне жіберілді. Ұйымдастырушы бұқаралық іс-шара ұйымдастырғаны үшін ҚР ӘҚБтК-нің 425-бабы «Халықтың санитарлық-эпидемиологиялық салауаттылығы саласындағы заңнама талаптарын бұзу, сондай-ақ гигиеналық стандарттар» бойынша айыптады.

«Мобильді топтар санитарлық-эпидемиологиялық нормалардың бұзылуына жол бермеу мақсатында барлық адамдардың жаппай жиналатын орындарын үнемі тексеріп отырады.  Алайда, бұған қарамастан, кейбір жауапсыз азаматтар мен мекеме иелері шектеуді бұзуды жалғастыруда және көптеген қонақтардың қатысуымен үйлену тойларын, отбасылық мерекелерін өткізіп, адамдардың денсаулығына қауіп төндіреді», - деді Түркістан облысының полиция бөлімі.

Полиция қызметкерлері мен жергілікті  мобильді топтар өкілдері тұрғындарға карантиндік талаптарды сақтау бойынша түсіндіру жұмыстарын үнемі жүргізетіндіктерін айтты.