Түркістан облысы: алма теріп жүрген жас жігіт тоққа түсіп мерт болды

Түркістан облысы Жоғарғы Қасқасу ауылында қайғылы жағдай орын алды. Бау-бақша арқылы тартылған жоғары кернеулі электр желісі себеп жас жігіттің өліміне себеп болған.  

Бұл туралы Orda.kz «Хабар 24-ке» сілтеме жасап хабарлайды.

Күні кеше ғана құда-жекжатты жиып, той өткізгелі отырған әулет енді аяқ астынан қайғыға душар болып қалды. Көз жасын тия алмай тұрған марқұмның әкесі түс көргендей халде. Себебі үлкен ұлының тойына дайындалып жатқан әке кенеттен екінші баласының жаназасын шығаруға мәжбүр болды.

Қайтыс болған ұлы алма теремін деп бау-бақшаның үстінен өткен жоғары кернеулі тоққа түсіп қалған. Бір сұмдықтың боларын іші сезгендей, жүрегі қан жылаған әке электр сымының төмен орналасқанын айтып, бірнеше мәрте мәселе көтерген екен.

– Қаншама жерге шағым жаздық. Ауданның әкіміне де бардық. «Nur Otan-ға» да бардық. Бәрі уәдені үйіп-төгіп берді, орындалмады. Міне, арыстандай азаматымнан айырылып отырмын бүгін, өздеріңіз куәсіздер. Енді білмейм, бұдан кейін не істеуге болатынын. Құртыңыздар, болмаса мен аралап тастаймын, - деді марқұмның әкесі.