Түркіменстанда студенттерді президенттің кітабын алуға міндеттеді

Түрікменстанда президент Гурбангулы Бердімұхамедовтың кітаптарын халық арасында насихаттау мен таратудың кезекті науқаны басталды.

Бұл туралы Orda.kz Орталық Азия жаңалықтар қызметіне сілтеме жасап хабарлады.

Тәуелсіздіктің 30 жылдығына орай шығарылған «Тәуелсіздік - біздің бақытымыз» кітабын Түркіменстанның мемлекеттік мекемелері мен кәсіпорындарының қызметкерлері мен студенттер сатып алуы керек.

Сонымен қатар, жекелеген аймақтар билігі президенттің шығармашылығын насихаттау үшін халықты ынталандыру шараларын қолданып жатыр. Лебап велаятында мәдениет қайраткерлеріне мемлекет басшысының жаңа туындысын мадақтайтын музыкалық шығармалар жасау тапсырылды. Жеңімпаздарға тәуелсіздіктің келесі мерейтойында табыс етілетін сыйақы уәде етілді.

Лебап университетіндегі студенттерді президенттің жаңа кітабын жатқа айтуға шақырады. Ынталандыру ретінде студенттерге 100 манат (шамамен 25 мың теңге) ақшалай сыйақы уәде етілді.

Мемлекеттік БАҚ-тың хабарлауынша, бұл кітап үш тілде - түрікмен, ағылшын және орыс тілдерінде басылып шыққан және елдің тәуелсіздік жылдарындағы жетістіктеріне арналған.

Түрікменстан президенті Гурбангулы Бердімұхамедов өзі басқарған 15 жыл ішінде 60-тан астам кітап шығарды. Кітаптар әр түрлі тақырыпты қамтиды және жүйелі түрде шығарылады. Дәстүр бойынша кітап шығару мереке күндері мен оқиғаларға сәйкес келеді. Елбасының авторлығымен шығарылған кітаптардың тақырыбына жылқы шаруашылығы, ит өсіру, түрікмен дәстүрі, кілемдер, шай мен дәрілік өсімдіктер де кіреді.