Түркіменстанда кезектен тыс президент сайлауы өтеді

Түркіменстан президенті Құрбанғұлы Бердімұхамедов елдің Орталық сайлау комиссиясына кезектен тыс президент сайлауын өткізуге дайындықты бастауды тапсырды.

Бұл туралы 12 ақпанда журналистерге берген сұхбатында Түркіменстан ОСК өкілі президент Бердімұхамедов республика ОСК төрағасы Гүлмурад Мұрадовқа қандай жұмыс тапсырғаны туралы мәлімдеді.

Осыған орай Түркіменстан Орталық сайлау комиссиясының өкілі мерзімінен бұрын президент сайлауы 12 наурызда өтетінін айтты.

Бұған дейін хабарлағанымыздай, 11 ақпанда халық кеңесінің отырысында елді 15 жыл басқарып келе жатқан президент Бердімұхамедов «жастарға жол ашып», қызметін жас басшыға тапсыруға ниетті екенін жеткізген. Бердімұхамедов тек Түркіменстан Халық маслахаты (парламенттің жоғарғы палатасы) төрағасы қызметін сақтап қалмақ.

Халық мәслихатының кезектен тыс отырысында сөз алған құрметті ақсақалдар Бердімұхамедовтің шешімін қолдады.

Айта кетейік, қазіргі уақытта Түркіменстан үкіметіндегі вице-премьер қызметін 2021 жылдың шілдесінен бері қаржы-экономикалық кешенге жетекшілік етіп келген президенттің ұлы Сердар Бердімұхамедов атқаруда.

Бұған дейін Сердар Бердімұхамедов премьер-министрдің орынбасары, жоғарғы бақылау палатасының төрағасы қызметін атқарды. 2021 жылдың 11 ақпанында мемлекеттік қауіпсіздік кеңесіне жұмыс істеді. Бұл қызметте ол мемлекеттік басқару жүйесінде, қаржы-экономикалық және әлеуметтік секторда цифрландыру мен инновациялық технологияларды енгізуге де жауапты болды. 2020 жылдың 7 ақпаны мен 2021 жылдың 11 ақпаны аралығында Сердар Бердімұхамедов индустрия және құрылыс өндірісі министрі қызметін атқарды. 2019 жылдың 17 маусымынан бастап президенттің ұлы Түркіменстанның орталық аймағы – Ахал велаяты (облысы) басшысы болған.