Түркия орман өрті үшін өлім жазасын қайтаруы мүмкін

Түркия президенті Режеп Тайып Ердоған MK.ru сайтына ормандарды өртегені үшін жаза ретінде өлім жазасын қайтару мүмкіндігін талқылау қажеттігін мәлімдеді.

Мугла провинциясының орман шаруашылығы басқармасы осы аптада Мармаристе үлкен орман өртінің шыққанын мәлімдеді. Желдің екпіні күшейіп, өрт аймақтың барлық аумағына таралуда. Сәрсенбі күні президент Ердоған Мармаристе тікұшақпен тексеріс жасады. Бұл жағдайды түрік билігі диверсия, яғни қасақана өртеу деп күдіктенген.

Түркия ішкі істер министрі Сүлейман Сойлу Мармаристе орман өртіне қатысты қасақана әрекет жасағанын мойындаған азаматтың ұсталғанын айтты. «Коммерциялық дауға байланысты ашуланған қаскөй орманды өртеп жіберген»  деді министр.

— Біз бір нәрсені  түсінуіміз керек: өлім жазасы туралы шешім қабылдау керек. Жаза қажет пе? Осындай өрескел жағдайларға бұл жаза қарастырылуы керек пе? Бұл туралы егжей-тегжейлі ойлану керек, - деді Ердоған мәселені талқылауға шақырып.

Түркияда республиканың Еуропалық Одаққа кіруі үшін қажетті шарттарға байланысты 2004 жылдың мамырында өлім жазасы алынып тасталды. Ердоған өлім жазасын Түркияның әділет жүйесіне қайтару қажеттілігі туралы бірнеше рет айтты, ол оның жойылуын өрескел қателік деп санайды.

Еске салайық, 2021 жылы 13 провинциядағы ауқымды орман өрттерінен туристік маусым қызып тұрған кезде  түріктің көптеген танымал курорттары өрт пен түтінге оранған болатын. Кей жерлерде жалын тұрғын үйлер мен қонақ үйлерге жақындап, туристер мен жергілікті тұрғындар эвакуацияланды. Құзырлы органдар оны өрт қою салдарынан болған деп күдіктенген. Кейін Түркиядағы өртке жауапкершілікті лаңкестік ұйым өз мойнына алды.