Түркия «минаға ұқсас» зат үшін Босфор бұғазын жауып тастады

Босфор бұғазының жағалау аймағында «минаға ұқсайтын» нысан табылды, деп хабарлады Түркияның Ұлттық қорғаныс министрлігі Twitter-де.

Оған елдің су астындағы қорғаныс күштері жіберілді. Бұғаз арқылы көлік қозғалысы жабылды.

«2022 жылдың 26 ​​наурызында азаматтық коммерциялық кеме Босфор бұғазының жағалау аймағында минаға ұқсас нысанды анықтағаннан кейін су асты қорғаныс топтары (SAS) оқиға орнына дереу жіберілді» делінген министрлік хабарламасында.

Түркияның су асты қорғаныс күштері нысанды қоршауға алып, оны залалсыздандыру шараларын қабылдады, деп хабарлады Қорғаныс министрлігі.

Түркияның Star басылымы елдің жағалау күзеті бас басқармасына сілтеме жасап, Босфор бұғазының екі бағытта да кеме қозғалысы үшін жабық екенін хабарлады.

Босфор және Дарданелл бұғаздары Мәрмәр теңізімен бірге Қара теңізді Жерорта теңізімен байланыстырады. Бұл Қара теңізден мұхитқа апаратын жалғыз жол. Бұғаздың екі жағы да Түркияның бақылауында. 1 наурызда Анкара барлық шет мемлекеттерге әскери кемелердің Босфор мен Дарданел арқылы өтуіне тыйым салынғаны  туралы ескерткен болатын.