«Түркия азаматтығын алуға өтініш берді» деген Бекболат Тілеухан паспортын көрсетті

Түркия азаматтығын алуға өтініш берді деген ақпарат шындыққа жанаспайтынын айтқан экс-депутат Бекболат Тілеухан Стамбұлдағы Қазақстан елшілігіне барып, өзінің төлқұжатын көрсетті. Түркия азаматтығын алмағанын дәлелдемек болған Бекболат қазақстандықтарға бейнеүндеу жолдады.

– Көк паспортым қолымда. Жұмысым қалпында. Ыстамбұлда жүріп жатырмын, – деді қоғам қайраткері.

Еске салайық, желіде тараған ақпаратты Бекболат Тілеухан жоққа шығарып, жалған ақпарат таратқандарды сотқа беретінін айтқан.

– Ақылға сыймайтын нәрсе, ел нанбайтын шығар деп ойладым. Сөйтсем, «басқа елдің азаматтығын алуға өтініш беріпті» дегенге ел иланып жатыр. Кәдімгідей нанып жатыр, ақылға сыймайтын, қисынға томпақ нәрсеге нанып жатыр. Менің Данияр, Олжас, Қуат сияқты бауырларым, мен үшін аяулы болған, аңғал, батыр жігіттер ғой, нанғыш. Солар нанып, шашып пост жазғанын көрген кезде бүйтіп мәлімдеме жасамаса болмайтынына көзім жетіп айтып отырмын. Қазақстанда қос азаматтыққа тыйым салынған. Қазақстанның көк паспортынан айрылатын ойым жоқ. Қадірлі бауырлар! Сайқал саясаткерлердің қисынсыз жаласына сенбеңіздер! Мен ешқашан бөтен елдің азаматтығына өтініш берген емеспін, – деді ол.